Nehwedroh

Die Texte

Akkorde

Sou 3, 4, 5, 6 mohl em Johr do klingelts an de Dier.
Draus schdähne meischdens ohns, zwoh Leid,die wolle was vun mir.
Mohl sinn sie g´schigd vum Gsangsvarei un mohl vum TBG
Un wann isch ebbes fa sie hehd dehde sie glei widda gäh.

En 14 Dohg, do wär ihr Feschd, sou mache sie ma´s klar.
Un ob ich ebbes gewwe dehd, fa ihr Tombola.
Ä Klohnischkeit die soll´d isch doch gewwe do däzu.
En klohne G´winn, der längt oh. Des dehd´s dann oh schunn duh.

Ich brauch en G´winn, ich brauch en G´winn,
mohl gugge ob isch glei was finn.
Ab en de Keller un dann schuch`schd irgend sou en alde Kruschd.
Ich brauch en G´winn, ich brauch en G´winn,
mohl gugge ob isch glei was finn.
Was kähn´d isch denne blous vaerwe, em Beschde sou en alde Scherwe.

Dann kummt der Dohg, es isch sou weit. Mir gähne oh do no.
En bunde Ohwed mit Musik. Isch danz mit meine Froh.
Der Höhepunkt kummt uff uns zu. Isch woh´s eisch issches klar.
Der Höhepunkt kann ohns blouß sei, nämlich die Tombola.

Mir kohfe Lose alle Farwe, Roud und Bloh un Grieh.
Ich hebs em G´schbier isch g´winn heit was,
des G´fiehl hewwi schunschd nie.
Die erschde Viere wohre Niede, des fünfte musses sei.
Jawoll des ischen G´winn ihr Leit, oh Mann wie ich mich frei.

Ich heb en G´winn, ich heb en G´winn!
machs glei uff, was isch do drinn?
Reis alles uff un gugg glei nei – ja was wärd do drin dann sei?
Ich heb en G´winn, ich heb en G´winn!
machs glei uff, was was wärd des sei?
Ach Gott was en alde Scherwe, denn heb isch jo selwa nei.
Ach Gott was en alde Scherwe, denn heb isch jo selwa nei.

Ledschd hod misch mohl ohna g´frohgt, ob isch wuanaschd wuhne woh´d
Ned do bei uns, em schähne Ort halt ganz wuanaschd, ganz weit fort
Em Ohfang hewwi bissl g´schduzt zum Zeitgewinn die Nohs gebutzt
Em liebschde wär´im an de Krohre Kamma sou was bleedes frohre
Isch hewwin ohgeguggt, ganz streng un heb dann g´soht aus de Lameng
Bass uff was isch da sohre du geb mohl acht un hoisch gut zu

Isch werr niemols Eskimo do isch´s immer sou kalt em Klo
Amerigoh isch nix fa misch weil do glei de Nejer bisch
En Russ willi schun gohnet sei die tringe liewa Schnapps wie Wei
Oh Spanie wär kohn Favorit, mit dem „Ole“ kumm isch net mit.
Isch werr oh nie en Hottetot weil’s dort gokoh Spargel hot
Ich gäi oh nimmie nieb noch France, weil die schwetze all durch´d Nohs
Die Schwedinne sinn ma zu dinn do bleiwisch liewa, wu isch bin
Uff Holland dehd isch niemohls gäh des wersch doch vastäh

Es gibt Leid, do isch´s egohl, die ziehe um, sou fünf, sechs Mohl
die sinn mohl do, die sinn mohl dort doch isch bleib do em Ort
Isch will net fort, en´d grouß weit Welt isch bleib dähohm un spoh mei Geld
wuanaschd, des wohs isch genau do kennisch doch koh Sau
Do wu isch bin, halt isch´s gut aus Misch treibt nix fort, mich ziehgt´s net naus
Des fellt mir doch em Drohm net ei wuanaschda dähom zu sei.

Isch werr niemols Eskimo do isch´s immer sou kalt em Klo
Amerigoh isch nix fa misch weil do glei de Nejer bisch
En Russ willi schun gohnet sei die tringe liewa Schnapps wie Wei
Oh Spanie wär kohn Favorit, mit dem „Ole“ kumm isch net mit.
Isch werr oh nie en Hottetot weil’s dort gokoh Spargel hot
Ich gäi oh nimmie nieb noch France, weil die schwetze all durch´d Nohs
Die Schwedinne sinn ma zu dinn do bleiwisch liewa, wu isch bin
Uff Holland dehd isch niemohls gäh des wersch doch vastäh

En Bayern siehts zwar ganz gut aus doch vun dähom griggsch misch net naus
Die Sachse die kannsch groh vadrohre wann sie ruisch sinn un nix sohre
En´d Palz kannsch korz mohl niwwagäh, ä Verdl tringe, dess isch schäh
doch wer kann dort lang glücklich sei uff de falsche Seit vum Rhei
Noch Hesse ziehgt mich´s net sou arg der Äppelwoi isch halt net stark
Uff Hamburg brauch´sch erscht gohnet gäh do dudd dich doch kohn Mensch vastäh
Un falls mich ohns mohl frohre sohd wu isch ganz b´schdimmt net wuhne woh´d
Ens Schwoweland do gähng´di net oh wanni arg viel Geld dort grähgd.

Ich wollt schun immer mohl ä Lied üwwa sie schreiwe
Meischdens hot ma awwa grohd koh Zeit
Doch mit soume Lied dud ma in Erinnrung bleiwe
Weil bei soume Lied, do denksch dann an die Leit

Wann mei Modda schaffe isch, hod sie misch hiegebrocht
Mei Oma hod dann schunn uff mich gwoht.
Jetzt gäisch erschd mohl rei un isch ä bissl was
sou hot sie immer zu ma g’soht

Ich heb Fernseh gugge derfe, bis spät en’d Nacht
Un mojends hot sie misch oh net glei g’weckt.
Die Entschuldischung fa’d Schul, hot sie ma imma g’schriewwe
Un ihr Gutselverstecke hewwisch immer glei entdeckt

Sou woh sie. mei Oma, lang isch’s her
Immer en guhde Spruch parroht
Sou woh sie. mei Oma, lang isch’s her
Un sie hot niemohls Un sie hot niemohls
Un sie hot niemohls „Isch heb das glei g’soht“ zumma g’soht

Zu Esse hod’s des gewwe, was isch ma g’wunsche heb
Meischdens Pommes, do däzu Sallohd
Den hod sie ohfach sou, mit de Händ oh’gmacht
Un gesse mit de Händ, hemman oh

Oh Zimmer, Kich und Bohd, des woh ihr ganzes Reich
Doch uns zwo hod’s glangt – allemohl
Em Fernseh drei Programme un meischdens noch Schwarz/Weiß
Mim Frankefeld un’me Glässl Wei woh’s erre wohl

Heit lebt sie schun lang nimmie, doch en mir lebt sie fort
Die gleiche Sprich wie sie, die mach isch oh
Un manchesmohl essich oh – wann’s kohna sieht
De Salohd mit de Hand, ja do lang isch noh

Sou woh sie. mei Oma, lang isch’s her
Immer en guhde Spruch parroht
Sou woh sie. mei Oma, lang isch’s her
Un sie hot niemohls Un sie hot niemohls
Un sie hot niemohls „Isch heb das glei g’soht“ zumma g’soht

Ich wollt schun immer mohl ä Lied üwwa sie schreiwe
Meischdens hot ma awwa grohd koh Zeit
Doch mit soume Lied dud ma in Erinnrung bleiwe
Weil bei soume Lied, do denksch dann an die Leit

Bei mir isch alles gut sordiert, die Schrauwe un die Diwwl
Jedes Ding des hot san Platz sogoh mei aldi Biwwl

Was d’annare entsorje des land em End bei mir
Ä Gießkann drauß vum Friedhouf Ä aldi Kellerdier

Isch häib oh wirklich alles uff was ma mohl brauche kähnd
Un owwaschdes Gebohd des isch: s’wärd oh nix valähnt!

Die Bildzeitung vum ledschde Johr die kannsch heid oh noch lese
Schunnämohl ganz älloh weje de Brischd en alle Gräise

Ziggohkischdlin vun de Oma Ä Gummibrill zum Tauche
En alde Rodio isch däbei ma kähnd mohl s’Kohwel brauche

Die alde Schrauwe flieje bei mir grohd nei en mei Bix
Ja die Männer vun de Müllabfuhr krieje vun mir nix

Isch schmeiß nix fort, isch schmeiß nix weg, des hot alles noch san Zweck
Des kannsch alles noch mohl brauche, bei mir fliegt nix en de Dreck
Isch schmeiß nix fort, isch schmeiß nix weg, des hot alles noch san Zweck
Des kähnd alles mohl was Wert sei, sogoh die alde Duddeseck.
sogoh die alde Duddeseck.

Was willsch dann mit dem alde Klump sou seschd mei Froh zu mir
Dohdruff hewwisch zu’re g’soht: Isch mach des alles weje Dir

Isch wohs als net, was die blouß hod sou spohd man doch, de Kies
Un lehwe kannsch sou (glohb ma’s na) wie em Paradies.

Sou manches fährt oh bei mir rum des hewwisch ma mohl g’lähnt
Em beschde isch, isch pald des Zeigs weil ma’s jo mohl brauche kähnd

Juddeferz vum ledschde Johr Ä Kummet, schä, aus Holz
De Keffisch noch vun unsam Hansi des isch man ganze Stolz
Wann Sperrmüll isch, dann duhn isch ma alles zammescherre
Ma wohs jo net, ob emohl die Zeite schlechter werre
Isch häib oh wirklich alles uff was ma mohl brauche kähnd
Un owwaschdes Gebohd des isch: s’wärd oh nix valähnt!

Isch schmeiß nix fort, isch schmeiß nix weg, des hot alles noch san Zweck
Des kannsch alles noch mohl brauche, bei mir fliegt nix en de Dreck
Isch schmeiß nix fort, isch schmeiß nix weg, des hot alles noch san Zweck
Des kähnd alles mohl was Wert sei, sogoh die alde Duddeseck.
sogoh die alde Duddeseck.

Frieher hosch ma als mohl Blumme gschenkt Zum Gebordsdohg 20 roude Rouse
Frieher hosch als mohl an misch gedenkt Heit sesch grohd noch zumma „Wesch mei House“
Frieher hosch mich als emohl gedriggt Un hosch misch uff deine Händ gedrohre
Angeblich wär ich heit zu schwer däzu Un du heedsch oh grohd ganz arg am Mohre

Heit isch alles nimmie sou wie´s frieher emmohl woh Heit isch alles annaschd, sesch’d mei Froh
Heit isch alles nimmie sou wie´s frieher emmohl woh Heit isch alles annaschd, sesch´d mei Froh.

Frieher wohre d`Leid zufrieden mit ganz wennisch Geld Do woh die Mark schließlich noch was wert
Ordnung hot noch g´herrschd, uff de ganze Welt Jeder hot oh g´wisst noch, was sich kehrt
Ä Schnitzel woh ä Schnitzel, fa neddemohl acht Mark Em Bierglohs woh en halwe Lidda drin
En Mohrekopf den hosch noch, farren Zehner griggt Un de Schorle woh oh net sou dinn

Heit isch alles nimmie sou wie´s frieher emmohl woh Heit isch alles annaschd, sesch’d mei Froh
Heit isch alles nimmie sou wie´s frieher emmohl woh Heit isch alles annaschd, sesch´d mei Froh.

Ohwends hods koh Langweil gewwe, vorm Haus isch ma do g´hoggt
Mim Nochbar und de Leid hod ma vazäilt.
Hot jeden noch gekennt, do bei uns em Ort Un eigentlich hot ohm goh nix g´fehlt.
Koh Telefon, kohn Fernseh kohn PC un trotzdem hemma imma aig viel g´lacht
Unsa Kinna frohre heitzudohg, was heddan dordmohls uhne Handy g´macht?

Heit isch alles nimmie sou wie´s frieher emmohl woh Heit isch alles annaschd, sesch’d mei Froh
Heit isch alles nimmie sou wie´s frieher emmohl woh Heit isch alles annaschd, sesch´d mei Froh.

Immer druff un dewedda joh net zurück immer noch vorne dann gibt’s ä Stick
immer dägeje iwwarohl däbei un des g´soht was denksch dann kennt die jeder glei

wann dann´s G´fiehl hosch dass dich kohns vaschdäid
un wann´s G´fiehl hosch dass nix mä weiter gäid
un wann dann_ähmol nimmie weida woh´sch
dann sohg ohfach: Leck mich grohd em Ohrsch

Leck misch äm Ohsch isch mach grohd was ich will
Leck misch äm Ohsch und schunn sin all minanna ganz still
Leck misch äm Ohsch Ihr seid ma all zu lasch
Heb´d misch ohfach hinnerum und steigt ma grohd e´d Dasch
Heb´d misch ohfach hinnerum und steigt ma grohd e´d Dasch

Es gähng´d oh ohfach un ganz ohgenehm awwa isch bin liewa ä bissl uhbequem
drumdeweje vorwärts un immer grohd grohdaus
weil wann du zulang wohdsch isch dei Lehwe aus

wann dann´s G´fiehl hosch dass dich kohns vaschdäid
un wann´s G´fiehl hosch dass nix mä weiter gäid
un wann dann_ähmol nimmie weida woh´sch
dann sohg ohfach: Leck mich grohd em Ohrsch

Leck misch äm Ohsch isch mach grohd was ich will
Leck misch äm Ohsch und schunn sin all minanna ganz still
Leck misch äm Ohsch Ihr seid ma all zu lasch
Heb´d misch ohfach hinnerum und steigt ma grohd e´d Dasch
Heb´d misch ohfach hinnerum und steigt ma grohd e´d Dasch

Isch schick des Lied naus en die Welt Grohd sou wie ä Schiff uffs Meer
Isch schick des Lied naus en die Welt Valleicht kummts nochemohl zurück
Valleicht kummts oh nimmie her

En Haufe Wünsch sinn neigepackt En Haufe Sorje mit däzu
Ä bissl Bleedsinn isch däbei Ä bissl Stress, ä bissl Ruh
En Haufe Johr vun meine Zeit En Haufe Gschischtlin vun uns Zwoh
Viel wu vazäild werd, und viel Gschwetz Mohl ehrlich, mohl ich gornix droh

Isch schick des Lied naus en die Welt Do isch faschd alles drin vun mir
Isch schick des Lied naus en die Welt Vielleicht gäids ohfach unna
Vielleicht land´s em End bei dir

Arg viel Uhnäidisch´s isch däbei Un vieles, was ma wischdisch isch
Ä poh mol glorre aus de Nout Em Beschde, wann des glei vagisch
Oh noch viel Uhmuhs kehrt däzu Em Lehwe kanns ned uhne gäh
Doch meischdens isch´s mit Sache gfillt Die wohre wirklich rischdisch schäh

Isch schick des Lied naus en die Welt Grohd sou wie ä Schiff uffs Meer
Isch schick des Lied naus en die Welt Valleicht kummts nochemohl zurück
Valleicht kummts oh nimmie her

So jetzt gäids fort, isch losses lous Loss treiwe, des find schunn sei Ziel
Vielleischd schun heit, vielleischd oh nie Glohb´s na, ich verlang ned viel.
Grohd dasses jemand finne dud ohn´s halt, wu des Lied vastäid
Un dem´s dann, wannas kehrt hot hinnenoch glei besser gäid.

Isch schick des Lied naus en die Welt Do isch faschd alles drin vun mir
Isch schick des Lied naus en die Welt Vielleicht gäids ohfach unna
Vielleicht land´s em End bei dir

Sou viel Johr sinn schun vagange, sou viel Johr sinn schun vorbei
Was sinn mir vorm Rodio g´hange hen ganz annare Gedange,
kriggd bei derre Duddelei.

De Bob Dillan isch oft g´loffe Roling Schdones und Nazaret
Lang wach g´leje un net g´schlohfe So viel Lieda, sou viel Strophe
Bis´d Modda g´soht hot „Ab ens Bett!

Un dann, emme schäne Dohg do heb isch sie griggd,
sie woh ganz bloh, wann isch da´s sohg isch heb sie heit noch vor ma´m Ohg
Hot de Neckamann sie gschiggd.

Mei erschdi Jeans, man ganze Stolz,
Ä Päärle House, faschd wie g´mohld
Vorne mit Knöpf, ganz silwarisch
Des woh die gräischd Fraid va misch

Mei erschdi Jeans, fa misch älloh
Net mohl gebraucht, no no ganz nei
Un der Schdoff wo rischdisch schwer
Isch woh´s noch, wie wanns geschdan wär.

Ja die wohre ganz schäh eng isch heb mich halt neigezwängt
hen gut gebasst en de Läng blous em Schritt ä bissl streng
do wuh´s normohlerweis mä hängt.

Wann isch en die Bohdwann bin do heb isch sie ohgepalde
Die meischde hen zwar g´soht, isch spinn, un ob ich noch ganz sauwa bin
Doch des wohre blous die Alde
Un wann ma misch grohd g´lossd hehd, hed isch sie jeden Dohg gedrohre
vun mojeds frieh bis owäds schpeht wann d´Modda net als gscholde hehd
zieg sie blous aus, isch kann dass sohre.

Mei erschdi Jeans, man ganze Stolz,
Ä Päärle House, faschd wie g´mohld
Vorne mit Knöpf, ganz silwarisch
Des woh die gräischd Fraid va misch

Mei erschdi Jeans, fa misch älloh
Net mohl gebraucht, no no ganz nei
Un der Schdoff wo rischdisch schwer
Isch woh´s noch, wie wanns geschdan wär.

Irgendwann woh´s hald bassiert un die Hous woh nimmie doh
en de Miehltonn, ganz vaschmiert vun de Modda masakriert
Isch denk do heit noch droh

Des woh doch blous ä Hous sou dudd ihr vielleicht denke
Doch mit derre woh isch grouß trotz dem durchgwetzte Schouß
sou was kann da kohna schenke.

Mansches kummt un mansches gäid und ganz wennisch des dudd bleiwe
vielleicht dass ohns vun eisch vaschdäid, wie´s emme grouße Buh sou gäid.
denkta an die alde Zeite

Mei erschdi Jeans, man ganze Stolz,
Ä Päärle House, faschd wie g´mohld
Vorne mit Knöpf, ganz silwarisch
Des woh die gräischd Fraid va misch

Mei erschdi Jeans, fa misch älloh
Net mohl gebraucht, no no ganz nei
Un der Schdoff wo rischdisch schwer
Isch woh´s noch, wie wanns geschdan wär.
Isch woh´s noch, wie wanns geschdan wär.

Em Muhndog Morje heb isch´s g´spiehrt bei mir lehft´s heit net wie g´schmiert
do hewwisch´s dann oh ganz schnell g´fiehlt Scheinboh hosch disch leicht vakiehlt.
Ich heb oh g´merkt, isch brauch jetzt Pfleg Zum Dokter isch mein erschte Weg
Isch meld mich oh, gebs Kärt´l ab oh liewa Mann, fiehl isch misch schlapp.

Des isch jo widda mohl ganz toll Des Wohdezimmer isch ganz voll
Des isch wie en schlimme Drohm em liebschde gähngdi widda hohm
Die nehwa mir, die kenn isch oh oh liewa Gott, was farre Froh
Wie halt isch des jetzt widda aus ich will blouß ohns, ich will do raus.

Des Wohdezimmer isch va sie en Drohm
em liebschde blieb sie do un gähng´d net hohm
Em Wohdezimmer des isch eisch ball klar
Ja em Wohdezimmer do isch sie de Star

Un schunn fängt sie s´vazäile oh ich hebs jo g´wisst, was farre Froh
iwwa ihr Fieß, die nimmie wolle geht´s weide glei mohl en die Volle
von dort kummt sie dann uff ihr Kreiz fa mich verliert des G´spräsch san Reiz
Ich will schun raus, will grohd noch weg schun kummt sie uff ihr Eiersteck.

Als negschd´s väzeilt sie vun de Driese Muss isch des wirklich alles wisse
Ihr gängd´s sou schlecht dud sie ma sohre ä annaschd´s dehd des net vadrohre
Sie dehd sou viel Tablette nemme un meeßt zu jedem Dokda renne
Korzum, ihr gähngd´s sou rischdisch schlecht sogoh de Stuhlgang wär zu feschd.

Des Wohdezimmer isch va sie en Drohm
em liebschde blieb sie do un gähng´d net hohm
Em Wohdezimmer des isch eisch jetzt klar
Ja em Wohdezimmer do isch sie de Star

Un schunn lehft sie zur Hochform uff un sterzt sich weiter uff mich druff
Wie hehd sie en de ledschd Zeit glitte unna ihre Hämmoridde
Isch heb schunn g´mohnt jetzt käm nix mehr doch sie rutscht näher zu ma her
und dann werds wirlich rischdisch mies sie zeigt ma noch ihr dicke Fies

Des held doch wirklich kohn Mensch aus Isch will blous ohns, ich will do raus
Isch grigg oh s´Gfiehl mei Kranged wär in Wirklichkeit goh net sou schwer
Der Nächste bitte, sesch´d ä Froh Kaum zu glohwe, isch bin droh
Ich sohg grohd noch Gott sei Dank sou schnell wär isch oh nimmie krank.

Des Wohdezimmer isch va sie en Drohm
em liebschde blieb sie do un gähng´d net hohm
Em Wohdezimmer des isch eisch ball klar
Ja em Wohdezimmer do isch sie de Star
Em Wohdezimmer hockt sie manschi Stund
Ja em Wohdezimmer do fiehlt sie sich g´sund
Kennt alle Krange-de schunn uf Ladein
Un alles gäid bei ihr uff Krankeschei

Egohl ob ich mohl später hohmkumm
Odda mohl ohna tringe woh
Ganz egohl en wellem Zustand isch erschein
Du bisch imma fa misch doh.

Du dusch imma zu ma halde
Un du dusch ohm niemohls wäi

Oh wann isch, ganz am Bodde unne bin
Dann bringsch du misch, en die Häi

Ich kumm immer zurück zu dir Ganz egohl, was zu ma sesch
Ich kumm immer zurück zu dir Ganz egohl, was mit ma mesch
Ganz egohl, was mit ma mesch

Du hosch misch sou lang ertrohre
Mit meine Mucke, meine Ferz
Desweje will isch jetzt ohmohl zu dir sohre
Dir kehrt mei ganzes Herz

Fa misch steht ohns ganz sicher fescht
Du wersch misch nimmie lous
Koh Geld der Welt kann ohm sou was ersetze
was isch sohg stimmt, glohb mas blous

Ich kumm immer zurück zu dir Ganz egohl, was zu ma sesch
Ich kumm immer zurück zu dir Ganz egohl, was mit ma mesch
Ganz egohl, was mit ma mesch

Isch wohs, dass ich net ganz perfekt bin
un dass so manchi annari Froh
mit mir schun längst ganz vazweifelt wär
un ich wär schun längscht widda äloh

Desweje nochmol, ganz zum Schluß
Sohg isch noch Ohns, un des isch wohr
Du kannsch des als Vaspreche, oder Drohung nemme
misch grigsch net lous fa d’nechschde 50 Johr

Ich kumm immer zurück zu dir Ganz egohl, was zu ma sesch
Ich kumm immer zurück zu dir Ganz egohl, was mit ma mesch
Ganz egohl, was mit ma mesch

Froä kenne manchches des woh´s jeder Mann
Froä kenne manchches was mancher Mann net kann.
Froä sinn als nitzlich des leischt jedem ei
Such´sch du mohl die Sogge dei Froh, die find sie glei.
Awwa s´gibt oh Sache do dudd ma sich schwer
ohns dodefuh des isch de Schdrohsevakehr
Do isch´s glei em beschde wamma selwa lenkt
und lesst sich dess net vermeide heb isch als schunn gedenkt:

Ich hogg nehwedroh am Steier hoggt mei Froh
Ich hogg nehwedroh un hebs Doudehemm oh
wann isch sohg foh grohdaus biegt sie ab
un rechts isch kaum noch Platz, do werds immer knapp
Ich hogg nehwedroh am Steier hoggt mei Froh
Ich hogg nehwedroh un hebs Doudehemm oh

En de Rickspiggel zu gugge lenkt nomohlerweis net ab
Doch Froä sin do annaschd gugge blous noch em Make up
Gschwindigkeit isch net ihr Ding, des woh´s isch uff alle Fell, weil
Mohl sinn sie zu langsohm und mohl sinn sie zu schnell
Sie heede wennisch Uhfäll sou grigg isch´s immer g´soht
des isch jo koh Wunna wamma an jeder Kreizung woht
Ich loss ma nix ohmerje gugg locker newenaus
Doch innerlich varreists mich faschd des helsch als schier net aus

Ich hogg nehwedroh am Steier hoggt mei Froh
Ich hogg nehwedroh un hebs Doudehemm oh
Ich wohs genau, dass ich´s besser wohs
doch wann isch sohg du bremse gibt sie Gohs
Ich hogg nehwedroh am Steier hoggt mei Froh
Ich hogg nehwedroh un hebs Doudehemm oh

Ich soll sie net nerve sou schelt sie als mit mir
Doch wanns um sei Auto gäid, do wärd en Mann zum Tier.
Wenn sie dann sou dicht uffährt kummt vun mir en Schrei
Gebb ä bissl Acht un mach ma blous kohn Kratzer nei.
Als Mann do bisch schun g´schdrohfd Als Mann, ja do hosch´s schwer
Un ganz arg schlimm do isch´s halt em Schdrohsevakehr
Manchmohl seschd sie zumma Fährsch du odda foh isch!
Em Beschde fa ä Froh isch halt sie schafft en de Kisch

Ich hogg nehwedroh am Steier hoggt mei Froh
Ich hogg nehwedroh un hebs Doudehemm oh
Wann ich selwa foh hewwisch mei Ruh
Doch hogg isch nehwedroh machisch ohfach d´Ohre zu.
Ich hogg nehwedroh am Steier hoggt mei Froh
Ich hogg nehwedroh un hebs Doudehemm oh
Ich hogg nehwedroh
Ich hogg nehwedroh
Ich hogg nehwedroh